កំណត់ត្រាក្រុមចូលរួមការប្រកួត World Cup ឆ្នាំ២០២៦ កើនដល់៤៨ក្រុម លើទឹកដីអា​ម៉េ​រិក កាណាដា និងម៉ិកស៊ិក ហើយការប្រកួតសរុបកើនពីចំនួន ៦៤ប្រកួត ដល់១០៤​ប្រកួត​។ 

រីឯ ការកែប្រែរូបមន្តរបស់ FIFA លើការប្រកួត CWC ដែលកើនចំនួនដល់៣២ក្រុម ហើយធ្វើឡើងរៀងរាល់៤ឆ្នាំម្តង បានក្លាយជាវិធីសាស្ត្រនៃការប្រកួតមួយ ដើម្បីធ្វើតេស្តមុន ចំពោះបញ្ហាអាកាសធាតុ ទីលាន ការធ្វើដំណើរ ឬកីឡដ្ឋានដែលត្រៀមខ្លួនសម្រាប់រៀប​ចំ​ការប្រកួត មុនព្រឹត្តិការណ៍ World Cup ចូលមកដល់។

មែនទែនទៅបញ្ហាធំៗ រួមមាន​អាកាសធាតុ និង​ស្មៅនៅលើទីលាន គឺជាបញ្ហាធំបំផុតសម្រាប់​អ្នករៀបចំ ឱ្យរិះរកមធ្យោបាយដោះស្រាយ។ 

បើតាម​ប្រធានសហព័ន្ធបាល់ទាត់អាម៉េរិក លោក Alan Rothenberg ការប្រកួតបាល់ទាត់​ពិភពលោក នឹងចំពេលអាកាសធាតុក្តៅដដែល ហើយបញ្ហាកំហុសមួយចំនួនដែល​កើត​មាន​ក្នុងការ​ប្រកួត CWC ប្រៀបដូចជាការផ្តល់មេរៀនដ៏សំខាន់មួយ សម្រាប់អ្នករៀបចំ ឱ្យ​គិតគូរខ្លាំងថែមទៀត សម្រាប់ព្រឹត្តិការណ៍ World Cup ឆ្នាំ២០២៦។

CWC ឆ្នាំ២០២៥ រកឃើញក្រុមជើងឯក ជាក្រុម Chelsea ដែលពួកគេបានផ្តួលក្រុម PSG លទ្ធ​ផល ៣​​-០ ដើម្បីលើកពានជាលើកទី២ ក្នុងប្រវត្តិសាស្រ្តខ្លួន។ ប៉ុន្តែព្រឹត្តិការណ៍នោះ អ្នក​រៀបចំការប្រកួត ប្រឈមមុខនឹងការរិះគន់ខ្លាំង និងការរអ៊ូត្អូញត្អែរ ពីក្រុមកីឡាករ អ្នក​គាំទ្រ និងគ្រូបង្វឹក ពីបញ្ហាអាកាសធាតុក្តៅខ្លាំង ដល់ជាង៣០អង្សាសេ និងទីលានប្រកួត​មាន​ស្មៅសភាពក្តៅ ស្ងួត និងកីឡដ្ឋានខ្លះ ប្រើស្មៅសិប្បនិមិ្មត។

នៅថ្ងៃបិទបញ្ចប់ការប្រកួត CWC លោក Gianni Infantino ប្រធាន FIFA  ក៏បាននិយាយ​ប្រាប់អ្នកកាសែតថា រាល់ការរិះគន់ទាំងឡាយដែល FIFA ទទួលបាន​ ស្ថាប័ននឹងយកទៅ​សិក្សា និងវិនិច្ឆ័យ ដើម្បីពង្រឹងសមត្ថភាពការប្រកួតឱ្យកាន់ល្អប្រសើរ។ ប្រធាន ​FIFA បន្ថែមថា ការប្រកួត World Cup ឆ្នាំ២០២៦ មានកីឡដ្ឋានដែលមានដំបូល និងការគ្រប់គ្រង​អាកាសធាតុល្អនៅពេល​រសៀល៕