លោក Hansi Flick គ្រូបង្វឹកក្រុម Barcelona បានជំរុញឱ្យមានភាពស្ងប់ស្ងាត់ និងគិតគូររយៈពេលវែង ខណៈដែល Gavi ជិតវិលត្រឡប់មកហ្វឹកហាត់វិញ បន្ទាប់ពីអវត្តមានពីការប្រកួតដោយសាររបួសរយៈពេល យូរ។

Gavi បានអវត្តមានអស់រយៈពេលជិតប្រាំខែហើយ បន្ទាប់ពីបានរងរបួសជង្គង់ក្នុងការហ្វឹកហាត់នៅថ្ងៃទី 29 ខែសីហា ឆ្នាំ 2025 ដែលជាជង្គង់ដូចគ្នានឹងពេលដែលគាត់បានរងរបួសដាច់សរសៃចងខាងមុខក្នុងខែវិច្ឆិកា ឆ្នាំ 2023។​

គាត់បានបង្ហាញខ្លួនត្រឹមតែពីរប្រកួតប៉ុណ្ណោះសម្រាប់ក្រុម Barcelona ក្នុងរដូវកាលនេះ ប៉ុន្តែត្រូវបានគេរាយការណ៍ថាបានចូលដល់ដំណាក់កាលចុងក្រោយនៃការជាសះស្បើយរបស់គាត់ បន្ទាប់ពីការហាត់ប្រាណ និងវគ្គព្យាបាលដោយចលនាអស់រយៈពេលជាច្រើនសប្តាហ៍ជាមួយគ្រូពេទ្យរបស់ក្លឹប។

លោក Flick បាននិយាយថា Gavi កំពុងតែមានភាពប្រសើរឡើងក្នុងការជាសះស្បើយរបស់គាត់ ប៉ុន្តែក្លឹបមិនប្រញាប់ប្រញាល់វិលត្រឡប់ មកលេងវិញដោយមិនសម្រេចបាននូវសុខភាពពេញលេញនោះទេ។

«ខ្ញុំឃើញគាត់ស្ទើរតែរាល់ថ្ងៃ» លោក Flick បានប្រាប់អ្នកយកព័ត៌មាននៅ ពេលសួរថាតើគាត់រំពឹងថា Gavi នឹងត្រលប់មកវិញនៅខែកុម្ភៈឬអត់។ «គាត់ កំពុងហ្វឹកហាត់ និងមានភាពប្រសើរឡើងច្រើន។ រឿងសំខាន់បំផុតសម្រាប់គាត់គឺ ត្រូវរក្សាភាពស្ងប់ស្ងាត់ ហើយធ្វើវាមួយជំហានម្តងៗ។ មិនចាំបាច់ប្រញាប់ប្រញាល់ទេ។ គាត់មានអាជីពដ៏វែងឆ្ងាយនៅខាងមុខ ហើយមិនចាំបាច់ប្រញាប់ប្រញាល់ទេ។ ប្រសិនបើគាត់ត្រលប់មកវិញនៅខែកុម្ភៈ យើងនឹងសប្បាយចិត្ត ប៉ុន្តែសម្រាប់ខ្ញុំ រឿងសំខាន់គឺថាគាត់ត្រលប់មកវិញមានសុខភាពល្អ»។

យោងតាមរបាយការណ៍មួយនៅក្នុង កាសែត Marca បានឲ្យដឹងថា Gavi ត្រូវបានគេរំពឹងថានឹងចាប់ផ្តើម ហ្វឹកហាត់ជាមួយមិត្តរួមក្រុមម្តងទៀតក្នុងរយៈពេលប្រហែល ១០ថ្ងៃ។ ដោយសារខ្សែបម្រើរូបនេះកំពុងស្ថិតក្នុង ដំណើរការជាសះស្បើយ ក្រុម Barcelona នឹងតាមដានគាត់យ៉ាងដិតដល់ដើម្បីមើលថាតើគាត់វិវឌ្ឍយ៉ាង ដូចម្តេច។